20 aprel 2014-ci il tarixində 6-cı siniflər arasında əvvəlcədən elan olunmuş proqramlaşdırma müsabiqəsi Bakının 264 nömrəli məktəbində böyük uğurla keçirilmişdir. Şagirdlər ALPLogo proqramlaşdırma mühitində 2 saat ərzində 3 tapşırığı yerinə yetirməli idilər. Tapşırıqların şərti informatik.az saytında “ALPLogo-2014” səhifəsində yerləşdirilmişdi. Müsabiqədə Bakı və Sumqayıt şəhərlərindən 25 şagird əyani olaraq iştirak etdi. İsmayıllı, Bərdə, Şabran və Ordubad rayonlarının şagirdləri isə müsabiqəyə İnternet vasitəsilə onlayn qatılmışlar. Şərtə görə regionlardan olan onlayn-iştirakçılar məsələləri müsabiqəyə start verilən vaxtından 30 dəq. əvvəl, səhər 9.30-da informatik.az saytından götürdülər. Əyani iştirakçılara isə tapşırıqlar çap olunmuş vərəqlərdə paylandı və proyektor vasitəsilə nümayiş etdirildi. Hər bir şagirdin işi vaxt bitən kimi yerli nümayəndə tərəfindən İnternet vasitəsilə münsiflər heyətinə göndərildi. Münsiflər heyətinin qərarına görə əvvəlcə Bakı və Sumqayıt şagirdlərinin, sonra isə onlayn-iştirakçların işləri yoxlanılacaq və bütün nəticələr 1-2 gün ərzində “İnformatika müəllimləri” qrupunda, informatik.az saytında və həftənin cümə günü “Azərbaycan müəllimi” qəzetində dərc ediləcəkdir.
Qeyd edək ki, şagirdlər iki il ərzində tanış olduqları ALPLogo proqramlaşdırma mühitində yüksək bacarıqlar nümayiş etdirirdilər.
Hal-hazırda işlərin yoxlanması və qiymətləndirilməsi prosesi davam edir.